As jy dink 'n lieplapper van 'n ploert sal jou vergoed vir 'n guns wat jy hom gedoen het, maak jy nie een nie, maar twee foute: ten eerste help jy iemand wat dit nie verdien nie en tweedens sal jy gelukkig wees as jy ongedeerd daarvan afkom.
'n Been het halfpad in wolf se keel af dwars gaan vassteek. Die pyn was iets allervreesliks, so wolf het met allerhande mooi beloftes van beloning begin uitkyk vir iemand wat hom kan verlos van die vervloekte ding in sy lyf. Hy het van dier tot dier gegaan en op die ou einde was dit 'n goedgelowige reier wat geval het vir die mooi broodjies en beloftes wat wolf gebak het. Reier waag toe haar lang bek en nek in die hande van die diep gat halfpad op pad na wolf se pens toe en voer die hoogsgevaarlike prosedure suksesvol uit. Tog, toe sy haar beloofde beloning verwag, snou die wolf haar toe: “O, jou ondankbare skepsel. Jy het sopas jou nek en kop sonder stamp, stoot of skraap uit my keel getrek, en dan het jy steeds die vermetelheid om vir 'n beloning te vra!”
Dit was min of meer soos Babrius die storie oorspronklik in Grieks aangeteken het. Dis altyd lekker om hom as bron te gebruik, oor sy vertellings altyd 'n tikkie humor, al is dit suiwer tong in die kies in het. Die outjies wat dit 1000 jaar later in Latyn vertaal het, was bykans almal baie serieus en het van die ligte vermaaklike aanslag ontslae geraak.
 |
| Fotobron |
Die eerste keer wat ek probeer het om die vertelling in Afrikaans te bring, het ek 'n ander teks gebruik, en toe het dit soos volg uitgekom:
Om hom te verlos van ‘n been wat dwars in sy keel bly steek het, huur wolf teen ‘n aardige bedrag die dienste van ‘n reier om haar kop in sy keel af te druk en die been uit te pik. Wat sy toe ook doen. Maar toe sy aandring op haar betaling, wys wolf grommend sy tande en sê met ‘n grynslag:“Het ek jou nie reeds genoeg vergoed deur nie jou kop van jou nek te byt toe dit in my kake was nie. Wees eerder bly jy het met jou lewe daarvan af gekom as om nou op geld aan te dring."
Moenie beloning verwag vir diens aan die skelms en booswigte gelewer nie, wees inderdaad eerder dankbaar as jy gelukkig genoeg is om nog heelhuids daarvan te kan ontsnap.
Fotobron (tensy afsonderlik aangetoon)
